شہر کی آنکھ میں مہتاب نہیں آ سکتا

شہر کی آنکھ میں مہتاب نہیں آ سکتا

 گاؤں سے اڑ کے تو تالاب نہیں آ سکتا

روز اک پیڑ سے کرتا ہوں تمہاری باتیں

 جو تمہیں دیکھنے پنجاب نہیں آ سکتا

گاؤں کے کچے سکولوں کی پڑھی لڑکی سن

شہر والوں کو ترا خواب نہیں  آ سکتا

میرے شکوے پہ سمندر نے مجھے خط لکھا

چاند جتنا بھی ہو بے تاب نہیں آ  سکتا

حسن والوں تمہیں ناقدری پہ رونا ہو گا

عشق تو ہو چکا نایاب نہیں آ  سکتا

شاہزادی، ہیں برے دن ترے شہزادے پر

ریشم و اطلس  و کمخواب نہیں آ سکتا

لوگ خوش خوش تھے عطا چشم کنارے آباد

 وہ سمجھتے تھے کہ سیلاب نہیں آ سکتا

احمد عطاء اللہ