Wo dekhta hai, yehi soch kar namaz paRhi

Wo dekhta hai, yehi soch kar namaz paRhi

 Hamesha ishq k zer e asar namaz paRhi

MaiN zindagi ko musalsal safar samajhta hooN

 So jab namaz paRhi, mukhtasar namaz paRhi

Samay se qabl, junooN k baghair, ishq kia

 AzaaN suni na wuzu tha, magar namaz paRhi

Qareeb thi koi masjid na paas jaye namaz

 Bicha k saaya, sar e reh guzar, namaz paRhi

Phir us se joR lia rabt jis se toRa tha

 Ghalat paRhi thi so bar e digar namaz paRhi

Suna hai pehlay yahaN aab, dastyaab na tha

 Phir ik faqeer ne aa kar idhar namaz paRhi

NamazioN ko riayat hai taiz barish maiN

 So jab bhi girya kia maiN ne, ghar namaz paRhi

Kahay ga, pehli namazaiN, namazaiN thiN hi nahiN

 Tumharay sath kisi ne agar namaz paRhi

MaiN paanch waqt azaanoN pe sochta hooN usay

 Kabhi qaza na hui, waqt par namaz paRhi

Ik aisi zaat bhi hai jo kabhi nahiN soti

 Ye sun k so na saka, raat bhar namaz paRhi

Umair Najmi