رات بھر جل کے چراغوں نے سحر تو کر دی

رات بھر جَل کے چراغوں نے سَحر تو کر دی
جَل بُجھے ہم بھی، مگر عُمر بسر تو کر دی
داستانیں تو ہواؤں میں سفر کرتی ہیں
ہم نے اِک رَو میں بیاں وجہِ سفر تو کر دی
تنِ بے جاں کو نہ چھیڑا، یہ کرم کیا کم ہے
ہم کو پہچانتے تھے، گھر میں خبر تو کر دی
دَم بس اِتنا ہے کہ اب دَر سے لگے بیٹھے ہیں
ترک ہم نے رَوِشِ دیدہء تَر تو کر دی
مُنہ نظر آتا ہے دیواروں میں اب یاروں کا
روکشِ آئنہ، دیوارِ ہُنر تو کر دی
ہاتھ دروازے کی دَرزوں پہ دَھرے بیٹھے ہیں
ہم نے تن پوشیء عُریانیء دَر تو کر دی
نجیب احمد