نہ تو حیراں وہ ہوئے ہیں نہ وہ حیراں ہوں گے

نہ تو حیراں وہ ہوئے ہیں، نہ وہ حیراں ہوں گے
آئینے خود عرق آلود و پَشیماں ہوں گے
اِنتشارِ دلِ وارفتہ نہ مِٹ جائے، کہ ہم
اور جمعیّتِ خاطر سے پریشاں ہوں گے
خوفِ ظُلمات نہیں بادَہ کشوں کو، ساقی
یہ جہاں جائیں گے، اِک بزمِ چراغاں ہوں گے
دیر ہے اذنِ جنُوں پانے کی دِیوانوں کو
پِھر، نہ زِنداں نہ گُلِستاں، نہ بیاباں ہوں گے
ایک آئی گی نظراصلیّتِ غیب و شہُود
دونوں عالَم تیری دِیدار میں یکساں ہوں گے
جانثاروں کو تِرے کب یہ خبر تھی، کہ تُجھے
دِل سے چاہیں گے، نِبھائیں گے، پشیماں ہوں گے
جلوۂ صُبحِ ازل، تِیرَگیِ شامِ اَبَد
تیرے عارض تیرے گیسُوئے پریشاں ہوں گے
لاکھ ہوں بے سَروساماں، مگر اے ذوقِ فَنا!
ہم جو باقی ہیں تو کیا بے سَروساماں ہوں گے
یہ تو تمہیدِ کَرَم ہے دِلِ خُوں گشتہ ابھی
دیکھ کیا کیا نِگہِ یار کے احساں ہونگے
اُس کے وعدے جو ہَوں پُورے، تو قیامت ہو فِراقؔ
نہ ہَوں پُورے تو یہ طُولِ شبِ ہِجراں ہونگے

فِراق گورکھپُوری