دشت طلب میں دھوپ کو ہم نے سائے سے تعبیر کیا

دشتِ طلب میں دھوپ کو ہم نے سائے سے تعبیر کیا

چاند ستارے دل میں اتارے، سورج کو تسخیر کیا

خون سے ہم نے دیپ جلائے، ظلم و ستم کی وادی میں

سنگ زنوں کے عہد میں ہم نے شیش محل تعمیر کیا

گلشن  گلشن  رنگ  اڑایا، بادِ  صبا  نے  پھولوں  کا

پتوں  پر  احوال  چمن  کا  موسم  نے  تحریر  کیا

لمحوں میں تعبیر بدل دی، اس نے تیرے خوابوں کی

لمحہ  لمحہ  جوڑ کے  ہم  نے  لمحوں  کو  زنجیر کیا

کل بھی پتھر تھا وہ اٹھائے، پھول سے نازک ہاتھوں میں

آئینے  کی  صورت  مجھ  کو  حیرت  نے  تصویر کیا

ہم  نے  فصیلِ شہرِ ستم  پر، گیت  لکھے  آزادی  کے

انگاروں  کو  پھول  بتایا ، رقص  تہِ  شمشیر  کیا

آج  ہمارے  زخموں  کا  وہ  پھول  مذاق  اڑاتے  ہیں

اپنے  لہو  سے  خاکِ چمن  کو  ہم  نے ہی  اکسیر کیا

سورج اِن سے پوچھ رہا ہے، اوڑھ کے دھوپ جو بیٹھے ہیں

شہرِ تمنا  میں  کس  کس  نے گھر  اپنا  تعمیر  کیا

چاند ستارے توڑنے والے، گھر کے دیپ بجھا بیٹھے

ایسے  ہی  لوگوں  نے اپنے  شہر  کو  بے  تنویر  کیا

دنیا  کو معلوم  ہے  یہ  اعجاز ہماری  وحشت  کا

حسن کو ہم نے دولت بخشی، عشق کو عالمگیر کیا

اعجاز رحمانی