آگ کے درمیان سے نکلا

آگ کے درمیان سے نکلا

میں بھی کِس اِمتحان سے نکلا​

پھر ہَوا سے سُلگ اُٹھے پتےّ

پھِر دُھواں گُلسِتان سے نکلا​

جب بھی نِکلا ستارۂ اُمّید

کُہر کے درمیان سے نکلا​

چاندنی جھانکتی ہے گلیوں میں

کوئی سایہ مکان سے نکلا​

ایک شُعلہ ، پِھر اِک دُھویں کی لکِیر

اور کیا خاکدان سے نکلا ؟​

چاند جس آسمان میں ڈُوبا

کب اُسی آسمان سے نکلا​

یہ گُہر جِس کو آفتاب کہیں !

کِس اندھیرے کی کان سے نکلا

شُکر ہے اُس نے بے وفائی کی

میں کڑے اِمتحان سے نکلا​

لوگ دشمن ہوئے اُسی کے، شکؔیب !

کام جِس مہربان سے نکلا​

شکیبؔ جلالی