منتخب اشعار خالد سجاد

خالد سجاد 

کے کچھ اشعار

۔۔۔۔۔۔۔۔۔ 

خود کروں گا میں سکونت وہاں خالد

ماں کا کمرہ کبھی ویراں نہیں ہونے دوں گا

۔۔۔۔۔۔۔۔۔

یادِ وصالِ یار نے ایسے دکھائے خواب

دن میں بھی اپنی آنکھ میں ہم نے سجائے خواب

۔۔۔۔۔۔۔۔۔۔

یہ تو ساری زمیں کی گردش ہے

گھومتا کب ہے آسمان جناب 

۔۔۔۔۔۔۔۔۔۔۔

زندگی کی تنہائی اس جگہ پہ لے آئی

اپنے ساتھ بھی شاید اب میں رہ نہیں سکتا

۔۔۔۔۔۔۔۔۔۔۔۔

محنت سے بنا لیتا ہوں قسمت کی لکیریں

تدبیر سے کرتا ہوں میں تقدیر مکمل

۔۔۔۔۔۔۔

میں جنہیں دن کے اجالے میں جھٹک آیا تھا

رات آئی تو وہی خواب اٹھا لائی ہے 

۔۔۔۔۔۔۔۔۔۔

اپنے دل میں سمیٹ کر رکھ لو

اب میں کم یاب ہوتا جاتا ہوں 

۔۔۔۔۔۔۔۔ 

دُنیا کی خواہش نے تو شرمندہ رکھا تھا

لیکن ایک دعا نے مجھ کو زندہ رکھا تھا 

۔۔۔۔۔۔۔۔۔۔۔

سخت مشکل میں بھی کب حوصلہ ہارا میں نے

گرتے گرتے بھی لیا اپنا سہارا میں نے

۔۔۔۔۔۔۔۔۔۔۔۔

میں نے کہا تھا مجھ کو پرندوں سے پیار ہے

پھر تو ہر ایک پیڑ نے سایہ دیا مجھے

۔۔۔۔۔۔۔۔۔۔۔۔

ٹھوکر لگا کے بِھیڑ ہٹائی ہے دوستو

یوں ہی کہاں کسی نے بھی رستہ دیا مجھے 

۔۔۔۔۔۔۔۔

وہ مجھ سے مل کے بہت خوش دکھائی دیتا تھا

اسی لئے تو میں شکوے پُرانے بھول گیا

۔۔۔۔۔۔۔۔۔۔

جس کی یادوں سے دل دھڑکتا ہے

کس طرح اب اسے بھلاؤں میں

۔۔۔۔۔۔۔۔۔۔۔

اب وہ چہرہ نہیں رہا خالد

آئنہ کس لئے سجاؤں میں

۔۔۔۔۔۔۔۔۔۔

اُس نے سونے کا بھاؤ کیا پوچھا

مسکرانے لگی دُکان جناب

۔۔۔۔۔۔۔۔۔۔

اس نے صحرا سے پکارا تھا مجھے

اور میں بہنے لگا دریا ہو کر

۔۔۔۔۔۔۔۔۔۔۔

تو سُنا دشت سے آنے والے

تجھ کو کیسا لگا پیاسا ہو کر 

۔۔۔۔۔۔۔۔

اُس نے ہی نام ترا لے کے تسلی دی ہے

جس نے محسوس کیا ہے ترے بیمار کا دکھ 

۔۔۔۔۔۔۔۔۔۔

یہ محبت کی لڑائی ہے تکبر مت کر

جیتنے والے تجھے ہو گا مری ہار کا دکھ 

۔۔۔۔۔۔۔۔۔۔۔

وہ کبھی عمر زیادہ نہیں جیتا خالد

جسکو بچپن میں ہی لگ جائے کسی یار کا دکھ

۔۔۔۔۔۔۔۔۔۔۔۔

جتنا سیراب ہوتا جاتا ہوں

خود میں غرقاب ہوتا جاتا ہوں 

۔۔۔۔۔۔۔۔۔۔

اُس نے منظر پہ رات پھیلا دی

اور میں خواب ہوتا جاتا ہوں

۔۔۔۔۔۔۔۔۔۔۔

اِتنا بھی کون یاد کرتا ہے

جتنا بے تاب ہوتا جاتا ہوں 

۔۔۔۔۔۔۔۔۔۔۔

اِتنی عجلت تو نہ کر ترکِ مراسم میں ابھی

تجھ سے برسوں کی مری جان شناسائی ہے

۔۔۔۔۔۔۔۔۔۔

جو بھی آتا ہے وہ اک روز چلا جاتا ہے

آسماں تجھ میں بھی دروازہ کُھلا ہے کوئی

۔۔۔۔۔۔۔۔۔۔۔۔۔

میرا تو صرف محبت پہ یقیں ہے خالد

اپنے گھر ہو گا اگر مجھ سے بڑا ہے کوئی

۔۔۔۔۔۔۔۔۔۔۔۔

ضعیفی اس لئے مجھ کو سہانی لگتی ہے 

اسے کمانے میں ہوری جوانی لگتی ہے 

نتیجہ یہ ہے کہ برسوں تلاشِ ذات کے بعد 

وہاں کھڑا ہوں جہاں ریت پانی لگتی ہے

۔۔۔۔۔۔۔۔۔۔

ضبط کا ایسے امتحان نہ لے 

اے مری جان میری جان نہ لے 

سانس رکُتا ہے تیرے رُکنے سے 

وقفہ باتوں کے درمیان نہ لے 

ترکِ اُلفت کا کہتے ڈرتا ہوں 

وہ کہیں میری بات مان نہ کے

۔۔۔۔۔۔۔۔