میری گردن نہ جھکی ، تن سے جُدا بھی نہ ہوئی

میری گردن نہ جھکی ، تن سے جُدا بھی نہ ھوئی 

خوش خُدا بھی نہ ھوا ، خلقِ خُدا بھی نہ ھوئی

غیر تو تھے ھی ، مرے یار بھی ناراض ھوئے 

مصلحت بھی نہ ھوئی مجھ سے ریا بھی نہ ھوئی

ھر نفس روح میں زنجیر رھا خوفِ قفس 

قید میں بھی نہ رھی جان رھا بھی نہ ھوئی

صاحبو ان کو تو مجبورِ خوشامد نہ کرو 

جن سے محبوب کی توصیف و ثنا بھی نہ ھوئی

نام بے راہ روی میں بھی نہ چمکا اپنا 

کام کی ھم سے کوئی لغزشِ پا بھی نہ ھوئی

سفرِ دشت پہ ھم شہر سے تنہا نکلے 

ابر تو تھا ھی کہاں ساتھ ھوا بھی نہ ھوئی

آج یوں شیشہء دل گنبدِ جاں میں ٹوٹا 

گونج تو گونج کوئی صوت و صدا بھی نہ ھوئی

مندمل زخم کا ھونا تھا مقدر ، ورنہ 

تم دوا پوچھتے ھو ، ھم سے دُعا بھی نہ ھوئی

کچھ کہیں پر تھا غلط آج ، کہ مل کر اس سے 

دل بھی سالم رھا مجروح انا بھی نہ ھوئی

تہمتِ جرمِ جفا کیسے اٹھائیں کہ نظر 

 ھم غریبوں سے تو جی بھر کے وفا بھی نہ ھوئی

ظہور نظر