لفظ پس لفظ

نظم "لفظ پسِ لفظ"
امجد اسلام امجد
مجموعہ کلام "ساتواں دَر"
سنہ  1976
۔۔
کِس قدر لفظ ھیں
جو ھم بولتے ھیں، رولتے ھیں
کون سا لفظ ھے کھولے گا جو دَر معنی کا،
اس کا پتہ کون کرے!
تُم تو خوُشبو ھو، ستاروں کی گُزرگاہ ھو تُم!
تُم کہاں آؤ گے اِس دشتِ پُراسرار کی پنہائی میں!
کیسے اُترو گے تمناؤں کی گہرائی میں!
رہ گیا میں ــــــــ !
سو اے جانِ وفا
میں تو جو کچھ ھوُں تمہارے ھی خمِ چشم سے ھوُں
تُم ھی جب لفظِ پسِ لفظ سے آگاہ نہیں
کِس طرح سحرِ مفاھیم کا دروازہ کُھلے
لفظ کی کوکھ میں تاثیر کہاں سے اُترے
تُم مِرے ساتھ ھو، ھمراہ نہیں!
کون سے خواب کے جگمگ میں نہاں ھیں ھم تُم!
کیسے گردابِ تمنا میں رواں ھیں ھم تُم!
لفظ کے پار جو دیکھیں تو کوئی راہ نہیں
اور تُم لفظِ پسِ لفظ سے آگاہ نہیں