نہ انتظار کی لذت نہ آرزو کی تھکن
نہ انتظار کی لذت نہ آرزو کی تھکن
بُجھی ہیں درد کی شمعیں کہ سو گیا ہے بدن
سُلگ رہی ہیں نہ جانے کس آنچ سے آنکھیں
نہ آنسوئوں کی طلب ہے نہ رتجگوں کی جلن
غریبِ شہر کسی سایہء شجر میں نہ بیٹھ
کہ اپنی چھائوں میں خود جل رہے ہیں سرووسمن
پھر آج شب تِرے قدموں کی چاپ کے ہمراہ
سُنائی دی ہے دلِ نامراد کی دھڑکن
امیر شہر غریبوں کو لوُٹ لیتا ہے
کبھی بہ حیلہء مذہب کبھی بنامِ وطن
ہوائے دہر سے دل کا چراغ کیا بُجھتا
مگر فراز سلامت ہے یار کا دامن
احمد فراز
Comments
Post a Comment