نصیب چل مجھے لے چل پئے سلام حبیب

نصیب چل مجھے لے چل پئے سلامِ حبیب
تڑپ رہا ہُوں زمانے سے حاضری ہو نصیب
طبیبِ عِشق کے دَر پر مِری قضا آۓ
وہ مُجھ کو دیکھے مَیں دیکھوں جمالِ رُوۓ طبیب
غریب جان کے ٹُھکرا دیا جہاں نے مُجھے
سُنے گا کون تُمھارے سِوا صداۓ غریب
حبیبِ پاک سے مِلنا خدا سے مِلنا ہے
بڑا کرم ہو کہ مِل جائیں نقشِ پاۓ حبیب
نصیب سنگِ حرم تیری رِفعتوں کے نِثار
بنا دے سنگِ مدینہ کبھی مِرے بھی نصیب
حبیبِ رب کی ثناء میں جو کہہ سکے کہہ جا
بہت بلند ہے تیرے سُخن سے شانِ حبیب
ادیبؔ حشر میں یُوں نعمتوں کا صلہ پاؤں
حُضُور حُکم سُنائیں کہ ہاں سُناؤ ادیبؔ

ادیب رائے پوری