بزم وفا سجی تو عجب سلسلے ہوئے

بزمِ وفا سجی تو عجب سلسلے ہوئے
شکوے ہوئے نہ ان سے، نہ ہم سے گلے ہوئے
پت جھڑ کا ذکر عہدِ خزاں میں نہ ہو سکا
تھے سر زمینِ دل پہ شگوفے کھلے  ہوئے
اِک عمر سے ہے دوش پہ بارِ مسافت
سنتے تھے منزلوں سے ہیں رستے ملے ہوئے
کل تک تھا صِرف شامِ جدائی کا احتمال
پیدا دلوں میں آج نئے فاصلے  ہوئے
یارائے گفتگو نہ تمنائے گفتگو
دیکھے ہیں ہم نے ہونٹ یہاں تک سِلے ہوئے
دیکھو ہمیں کہ ہم نے ابھارے ہیں آفتاب
دیکھو ہمیں کہ خاک  میں ہیں ملے ہوئے
یزدانیؔ حزیں ہے عجب زندگی کا باغ
کانٹوں کے درمیاں ہیں شگوفے رکھے ہوئے

یزدانی جالندھری