وہ کتنی سادگی سے اپنی جاں گنوا بیٹھے

وہ کتنی سادگی سے اپنی جاں گنوا بیٹھے
مکان گرنے کے ڈر سے چھتوں پہ جا بیٹھے

عجب تھے ھم بھی، کہ سیلاب کے اُترتے ھی
کنارِ آبِ رواں بستیاں بسا بیٹھے

صدا جو دی تو پلٹ کر ھمیں پہ آ کے گِری
ھم ایک بار خدا کو جو آزما بیٹھے

ھم اِک درخت سے یہ سوچ کر جُدا نہ ھُوئے
پرند ٹوُٹی ھُوئی شاخ پر نہ آ بیٹھے

فریب کھانے کو پیشہ بنا لیا ھم نے
جب ایک بار وفا کا فریب کھا بیٹھے

کِسے خبر تھی کہ ترکِ تعلقات کے بعد
وھی تو یاد رھیں گے جنہیں بُھلا بیٹھے

ندیم ھم کو تو اِس جُرم کی مِلی ھے سزا
کہ عدل مانگنے کو ھاتھ کیوں اُٹھا بیٹھے

احمد ندیم قاسمی