جو سیل درد اٹھا تھا وہ جان چھوڑ گیا​

جو سیلِ درد اٹھا تھا، وہ جان چھوڑ گیا​
مگر وہ جسم پہ اپنا نشان چھوڑ گیا​
​
ہر ایک چیز میں خوشبو ہے اُس کے ہونے کی​
عجب نشانیاں وہ مرا مہمان چھوڑ گیا​
​
ذرا سی دیر کو بیٹھا، جُھکا گیا شاخیں​
پرندہ پیڑ میں اپنی تھکان چھوڑ گیا​
​
بہت عزیز تھی نیند اُس کو صبحِ کاذب کی​
سو اُس کو سوتے ہوئے کاروان چھوڑ گیا​
​
رہا ریاض اندھیروں میں نوحہ کرنے کو​
وہ آنکھیں نوچنے والا زبان چھوڑ گیا​
​
ریاض مجید​