ہر اک یہ کہتا ہے اب کار دیں تو کچھ بھی نہیں

ہر اِک یہ کہتا ہے اب کارِ دِیں تو کُچھ بھی نہیں

یہ سچ بھی ہے کہ مزا بے یقیں تو کُچھ بھی نہیں

تمام عُمر، یہاں خاک اُڑا کے دیکھ لِیا

اب آسمان کو دیکھوں،  زمِیں تو کُچھ بھی نہیں

مِری نظر میں تو بس، ہے اُنھیں سے رونقِ بزم

وہی نہیں ہیں جو اے ہمنَشِیں! تو کُچھ بھی نہیں

حَرَم میں مُجھ کو نظرآئے صر ف زاہدِ خُشک

مکان خُوب ہے لیکن مکیں تو کُچھ بھی نہیں

تِرے لَبوں سے ہے البتہ اِک حلاوتِ زیست!

نبات، قند، شکر، انگبیں تو کُچھ بھی نہیں

بہ قول حضرتِ محشر کلام شاعر کا !

پسند آئے تو سب کُچھ، نہیں تو کُچھ بھی نہیں

  

وہ کہتے ہیں کہ تُمھِیں ہو، جو کُچھ ہو اے اکبرؔ

ہم اپنے دِل میں ہیں کہتے، ہَمِیں تو کُچھ بھی نہیں

اکبرؔ الٰہ آبادی