پھر ہوئی روح کیف سے معمور

پھر ہوا سازِ مدح زمزمہ سنج
پھر ہوئی روح کیف سے معمور

مٹ گئے فاصلے دل و جاں کے
نہ رہا فرقِ ظاہر و مستور

زہے الطافِ سیّدِؐ ابرار
مطمئن ہو گیا دلِ رنجور

زہے اکرامِ رحمتِؐ عالم
محترم ہو گئے جو تھے مقہور

امّئ نکتہ داں کی حکمت سے
حل ہوئے سب مسائلِ جمہور

آیۂ نور چہرۂ روشن
کیوں نہ تابندہ ہوں شبِ دیجور

دافعِ رنج و یاس و کرب و الم
قاطعِ کفر و شرک و فسق و فجور

محور و منتہائے فکر و نظر
چارہ فرمائے خاطرِ مہجور

راحت و اعتبارِ دیدۂ تر
عظمت و اختیارِ ہر مجبور

اُس کے اوصاف کا احاطہ کروں
یہ کہاں تاب، یہ کہاں مقدور

چارہ جُز اعترافِ عجز نہیں
ذہن قاصر، شعور ہے معذور

صلۂ مدحِ مصطفےٰﷺ چاہوں
یہ نہیں میری طبع کو منظور

کیا یہ اعزاز کم ہے میرے لئے
نعتِ خیر الوریٰﷺ پہ مامور

میرا ہر سانس ہے سپاس گزار
اے خداوندِ فکر و فہم و شعور

بہ تقاضائے دیدۂ بے تاب
کچھ نہ کچھ مجھ کو مانگنا ہے ضرور

سوچتا ہوں کہ تجھ سے کیا مانگوں
اے خدائے کریم و ربِّ غیور

میرا دامانِ آرزو محدود
اور تیرا کرم ہے لا محصور

ہاں خطا سے مری ہوں صرفِ نظر
سعئ ناقص ہو مقبل و مشکور

حرزِ جاں ہو مجھے ثنائے رسولﷺ
رگ و پے میں ہو کیف و جذب و سرور

لب رہیں ترجمانِ صدق و صفا
دل ہو کذب و مبالغہ سے نفور

قبر میری بحقِّ ختمِ رسلﷺ
ہو فراخ و معنبر و پُر نور

سائبانِ کرم ہوں سر پہ مرے
سر میدانِ حشر، یومِ نشور

آخرت کے سبھی مراحل میں
میرے نزدیک تر ہوں حضورﷺ

حفیظ تائب