ہمارا اور عالم ہم کو اس عالم سے کیا مطلب​

ہمارا اور عالم ہم کو اس عالم سے کیا مطلب​

کسی سے کیا غرض ہم کو کسی کو ہم سے کیا مطلب​

 تماشے سب جہاں کے ہم نے دیکھے ساغرِ مے میں​

قسم آنکھوں کی ساقی ہم کو جامِ جَم سے کیا مطلب​

جراحت میں مِرے کچھ نون مرچیں پیس کر بھر دو​

کہ ہے یہ زخم عاشق کا اسے مرہم سے کیا مطلب​

عرق آلودہ عارض تیرے دیکھوں اے گلستاں رو​

مجھے کیا کام گلشن سے گل و شبنم سے کیا مطلب​

سیہ بختی سے اپنی اس بلا کے پیچ میں آیا​

وگرنہ دل کو میرے زلفِ خم در خم سے کیا مطلب​

جو یہ سمجھے کہ ملتا ہے وہی جو کچھ ہے قسمت میں​

رہا ان کو ظفؔر پھر فکرِ بیش و کم سے کیا مطلب​

بہادر شاہ ظفر