تری طلب تھی ترے آستاں سے لوٹ آئے

تری طلب تھی ترے آستاں سے لوٹ آئے 

خزاں نصیب رہے، گلستاں سے لوٹ آئے 

 بصد یقیں بڑھے، حدِ گماں سے لوٹ آئے 

دل و نظر کے تقاضے کہاں سے لوٹ آئے

سرِ نیاز کو پایا نہ جب ترے قابل 

خرابِ عشق ترے آستاں سے لوٹ آئے 

قفس کے انس نے اس درجہ کر دیا مجبور 

کہ اس کی یاد میں ہم آشیاں سے لوٹ آئے 

بلا رہی ہیں جو تیری ستارہ بار آنکھیں 

مری نگاہ نہ کیوں کہکشاں سے لوٹ آئے 

نہ دل میں اب وہ خلش ہے نہ زندگی میں تڑپ 

یہ کہہ دو پھر مرے دردِ نہاں سے لوٹ آئے 

گلوں کی محفل رنگیں میں خار بن نہ سکے 

بہار آئی تو ہم گلستاں سے لوٹ آئے 

فریب ہم کو نہ کیا کیا اس آرزو نے دئیے 

وہی تھی منزل دل ہم جہاں سے لوٹ آئے

خاطر غزنوی