یہ چار حرف نہیں داستان رحمت ہے

یہ چار حرف نہیں، داستانِ رحمت ہے

عزیزو ! اسمِ محمد جہانِ رحمت ہے

 اِسی لئے ہے شفاعت کا حق فقط اُن کو

کہ اُن کی شان ہی شایانِ شانِ رحمت ہے

پڑھی ہیں ساری احادیث مَیں نے اُردو میں

یہ ترجمہ بھی عجب ترجمانِ رحمت ہے

بنے ہیں نعت کی تحریک وارثین ِ نعت

خُدا کُھلا رکھے اُن پر جو خوانِ رحمت ہے

حضور ! کیجیے لاہور پر بھی ایک نظر

یہ بستی بستئ وابستگانِ رحمت ہے

مَیں کربلا سے چلا اور مدینے تک پہنچا

یہ بامِ عشق ہے، وہ آسمانِ رحمت ہے

کروڑوں چاند ہیں روشن ہر ایک مصرعے میں

ہر ایک حرفِ ثنا شمعدانِ رحمت ہے

یہ بات سچ ہے کہ ہاشم سے لے کے احمد تک

بس اک گھرانہ نہیں، کاروانِ رحمت ہے

ہماری ناؤ کو طوفاں کا ڈر نہ بجلی کا

کہ اس پہ سایہ فگن بادبانِ رحمت ہے

بروزِ حشر نہ گھبرائے گا دلِ فارس

گناہگار سہی، نعت خوانِ رحمت ہے

رحمان فارس