اس سے گلے شکایتیں شکوے بھی چھوڑ دو

اس سے گلے شکایتیں شکوے بھی چھوڑ دو
در اس کا چھٹ گیا تو دریچے بھی چھوڑ دو
کیسا ہے وہ کہاں ہے؟ بنا کس کا ہمسفر؟
بہتر ہے کچھ سوال ادھورے بھی چھوڑ دو

اک بے وفا کا "نام" لکھو گے کہاں تلک؟
اوراق اپنے ماضی کے سادے بھی چھوڑ دو
جینے کے واسطے نہ "سہارے" کرو تلاش
جب ڈوب ہی رہے ہو تو تنکے بھی چھوڑ دو
شاید نئے "مکان" میں ان کا نہ "دل" لگے
گھر چھوڑنے لگو تو "پرندے" بھی چھوڑ دو
دریا سے "دور" رہنا ہے بہتر ہے اب شکیل
دھارے سے کٹ گئے تو کنارے بھی چھوڑ دو

شکیل شمسی