ہوا ہے دل مرا مشتاق تجھ چشم شرابی کا

ہوا ہے دل مرا مشتاق تجھ چشم شرابی کا
خراباتی اُپر آیا ہے شاید دن خرابی کا
کیا مدہوش مجھ دل کوں آ نیندی نین ساقی نے
عجب رکھتا ہے کیفیّت زمانہ نیم خوابی کا
خطِ شب رنگ رکھتا ہے عداوت حسن خوباں سے
کہ جیوں خفّاش ہے دشمن شعاعِ آفتابی کا
نہ جاؤں صحن گلشن میں کہ خوش آتا نئیں مجکوں
بغیر از ماہ رو ہرگز تماشا ماہ تابی کا
نہ بوجھو اب ہوا ہے کم سخن وو دلبر رنگیں
لب تصویر پر ہے رنگ دائم لاجوابی کا
پری رخ کوں اٹھانا نیند سوں برجا ہے اے عاشق
عجب کچھ لطف رکھتا ہے زمانہ نیم خوابی کا
نہ جانوں کس پری رو سوں ہوا ہے جا کے ہم زانو
کہ آئینے نے پایا ہے لقب حیرت مآبی کا
ولیؔ سوں بے حسابی بات کرنا بے حسابی ہے
نئیں وو آشنا اے یار ہرگز بے حسابی کا
ولی دکنی