چلے بھی آؤ کہ حجت تمام ہو چکی ہے

چلے بھی آؤ کہ حُجت تمام ہُو چُکی ہے
دِیا جلانے کا مطلَب ہے شام ہُو چُکی ہے
گُذر چُکی ہے اذیّت سے چشمِ خواب آثار
سکوتِ شب سے نظَر ہم کلام ہُو چُکی ہے
جھکائے رکھّیں گے ہم یوں ہی اپنی گردن کو
وہ تیغِ تیز اگر  بے نیام ہُو چُکی ہے
جسے بھی دیکھیے مِلتا ہے بے نیازی سے
محبتوں کی روش کِتنا عام ہُو چُکی ہے
ہمارے خواب ہَوا میں اُڑائے جائیں گے
ہماری نیند پرندوں کہ نام ہُو چُکی ہے
وہ داستاں جو تہِ خاک و خوں لکھی گئی تھی
شروع ہُونے سے قبل اختتام ہُو چکی ہے
زمیں پہ حشر بپا ہونے کو ہے آخرِ کار
تمام خلق ہوس کی غلام ہُو چُکی ہے
بتاؤں کیا کہ مکمل مِری حیات آزَر
بغیرِ عشق بہ صد اہتمام ہُو چُکی ہے
دلاور علی آزر