رکھے رب اچیری بابا
رکھے رب اُچیری بابا
ہر ویلے پگ تیری بابا
اج تے عید اے اج تے نہ جا
اج تے رہین دے پھیری بابا
نِت نِت وٹے کھاون نالوں
پُٹ ای دے توں بیری بابا
چھپراں دے ای آل دوالے
رہندی کیوں اے نھیری بابا
جو جمے آں جوہ ہنساں دی
کاواں ہوئی اے گھیری بابا
اُکو دُکھ تے اِک کہانی
چِڑیاں دی تے میری بابا
ایتھے اوہیو بُھکھے نیں ناں
جِہناں کول ودھیری بابا
کہ کے مِٹھےپھل صبراں دے
توں کیوں اتھر کیری بابا
تیرے وانگوں اج میں کیتی
بھکھ دے نال بتھیری بابا
ارشاد سندھو
Comments
Post a Comment