تو عروج دے کہ زوال دے
تو عروج دے کہ زوال دے
فقط اپنی راہ پہ ڈال دے
مجھے چھین لے غمِ دہر سے
فقط اپنے غم کا ملال دے
مرے خواب آنکھوں سے نوچ لے
کوئی سوچ دے نہ خیال دے
میں جو منزلوں کا حریص ہوں
مجھے راستوں کا وبال دے
مجھے مال و زر کی نہیں طلب
مرے فن کو اوجِ کمال دے
میری ظلمتوں میں کمی نہ کر
مرے جگنووں کو اجال دے
ہے بہت طویل رہِ وفا
مجھے فرصتِ مہ و سال دے
جو سمجھ سکیں مرے سامعیں
وہی حرف و صوتِ فعال دے
میرے آئنے کو زباں ملے
میری حیرتوں کو سوال دے
میرے پھیلے ہاتھوں کو خوف ہے
کہ تو مسکرا کے نہ ٹال دے
سید اسد معروف
Comments
Post a Comment