نظر اٹھی جدھر بھی ہم نے ان کو جلوہ گر دیکھا

نظر اٹھی جدھر بھی ، ہم نے ان کو جلوہ گر دیکھا 

بہ قلب مطمئن دیکھا ، بہ چشم معتبر دیکھا

نہ ہم کو دیکھ لے کوئی یہ اطمینان کر دیکھا

انہیں دیکھا ، مگر پہلے ادھر دیکھا ، ادھر دیکھا

ستم جھیلے ،سمیٹے غم ،لگا دی جان کی بازی

جو ہم سے ہو سکا راہ وفا میں ہم نے کر دیکھا

وہی ہوں جلوہ ساماں جس طرف واعظ ! نظر اٹھے

انہیں کو جب نہیں دیکھا تو پھر کیا اپنا سر دیکھا

عجب سودا ہے بازار جہاں میں دل کا سودا بھی

منافع کم نظر آیا ، خسارابیشتر دیکھا

ہماری وحشت دل کی نہ پوچھے داستاں کوئی

گئے ہیں بعد میں صحرا کی جانب ، پہلے گھر دیکھا

ہمیشہ احترام جلوہ میں جھکتی رہیں آنکھیں

کبھی ہم نے نظر بھر کر نہ ان کو عمر بھر دیکھا

 جو کل تک دور تھے ، وہ آج اپنے پاس بیٹھے ہیں

نصیرؔ ! اخلاص کی باتوں کا  ہم نے اثر یہ دیکھا

پیر نصیر الدین نصیر گیلانی